ദക്ഷിണാഫ്രിക്കൻ ക്രിക്കറ്റ് ടീം മുൻ നായകൻ ഫാഫ് ഡു പ്ലെസിസ് 2026-ലെ ഇന്ത്യൻ പ്രീമിയർ ലീഗ് (ഐ.പി.എൽ) സീസണിൽ നിന്നും പിന്മാറി. അടുത്ത മാസം നടക്കാനിരിക്കുന്ന താരലേലത്തിൽ തന്റെ പേര് ഉണ്ടാവില്ലെന്ന് ഡുപ്ലെസിസ് പ്രസ്താവനയിലൂടെ അറിയിച്ചു. ഭാവിയിൽ തീർച്ചയായും ഐപിഎല്ലിലേക്ക് തിരിച്ചുവരുമെന്നും ഡു പ്ലെസി പറയുന്നു.
'കഴിഞ്ഞ 14 വർഷമായി ഞാൻ ഐപിഎൽ കളിക്കുന്നു. ഈ വർഷത്തെ ലേലത്തിൽ എന്റെ പേര് ഉൾപ്പെടുത്തേണ്ടെന്ന് ഞാൻ തീരുമാനിച്ചു. ഇതൊരു വലിയ തീരുമാനമാണ്, തിരിഞ്ഞുനോക്കുമ്പോൾ വലിയ നന്ദിയോടെയാണ് ഞാനത് കാണുന്നത്. ഐപിഎൽ എന്റെ ക്രിക്കറ്റ് കരിയറിന്റെ ഒരു വലിയ ഭാഗമായിരുന്നു. ലോകോത്തര താരങ്ങൾക്കൊപ്പം മികച്ച ഫ്രാഞ്ചൈസികൾക്ക് വേണ്ടി, വലിയ ആരാധകർക്ക് മുന്നിൽ കളിക്കാൻ എനിക്ക് കഴിഞ്ഞു. ഒരു ക്രിക്കറ്റ് താരമായും വ്യക്തിയെന്ന നിലയിലും മികച്ച സൗഹൃദങ്ങളും വലിയ പാഠങ്ങളും ഒരുപാട് ഓർമകളും എനിക്ക് ഇന്ത്യയിൽ നിന്ന് ലഭിച്ചു.' ഡു പ്ലെസിസ് ഇൻസ്റ്റാഗ്രാമിൽ പോസ്റ്റ് ചെയ്ത പ്രസ്താവനയിൽ പറഞ്ഞു.
'എന്റെ എല്ലാ പരിശീലകർക്കും സഹതാരങ്ങൾക്കും സപ്പോർട്ട് സ്റ്റാഫ് അംഗങ്ങൾക്കും വർഷങ്ങളായി എന്നെ പിന്തുണച്ച എല്ലാ ആരാധകർക്കും നന്ദി. 14 വർഷം എന്നത് വലിയ കാലയളവാണ്. എല്ലാത്തിലും ഞാൻ അഭിമാനിക്കുന്നു. ഇന്ത്യക്ക് എൻ്റെ ഹൃദയത്തിൽ ഒരു പ്രത്യേക സ്ഥാനമുണ്ട്. ഇത് തീർച്ചയായും വിട പറയലല്ല. നിങ്ങൾ എന്നെ വീണ്ടും കാണും,' ഡു പ്ലെസിസ് കൂട്ടിച്ചേർത്തു.
'ഈ വർഷം, ഞാൻ ഒരു പുതിയ വെല്ലുവിളി ഏറ്റെടുക്കാൻ തീരുമാനിച്ചു. വരാനിരിക്കുന്ന പിഎസ്എൽ (പാകിസ്താൻ സൂപ്പർ ലീഗ്) സീസണിൽ ഞാൻ കളിക്കും. ഇത് എന്നെ സംബന്ധിച്ചിടത്തോളം ആവേശകരമായ ഒരു ചുവടുവെപ്പാണ്. ഒരു കളിക്കാരനായി വളരാനും അവിശ്വസനീയമായ പ്രതിഭകളും ഊർജ്ജവും നിറഞ്ഞ ഒരു ലീഗിൽ കളിക്കാനുമുള്ള ഒരവസരമാണിത്. ഒരു പുതിയ രാജ്യം. ഒരു പുതിയ അന്തരീക്ഷം. ഒരു പുതിയ വെല്ലുവിളി. പാകിസ്താനിൽ കളിക്കാനായി ഞാൻ ആകാംക്ഷയോടെ കാത്തിരിക്കുന്നു,' ഡു പ്ലെസിസ് വ്യക്തമാക്കി.
ഐപിഎല്ലിൽ 154 മത്സരങ്ങൾ കളിച്ച ഡു പ്ലെസിസ് 4,773 റൺസെടുത്തിട്ടുണ്ട്. ചെന്നൈ സൂപ്പർ കിങ്സ്, റൈസിങ് പൂനെ സൂപ്പർ ജയന്റ്സ്, റോയൽ ചലഞ്ചേഴ്സ് ബെംഗളൂരു, ഡൽഹി ക്യാപിറ്റൽസ് തുടങ്ങിയ ടീമുകളിൽ ഡു പ്ലെസിസ് കളിച്ചിട്ടുണ്ട്. ഇതിൽ ഏഴ് സീസണുകൾ ചെന്നൈ സൂപ്പർ കിങ്സിനൊപ്പമായിരുന്നു ഡു പ്ലെസി കളിച്ചത്. 2018, 2021 സീസണുകളിൽ ഡു പ്ലെസി ചെന്നൈയ്ക്കൊപ്പം കിരീടം സ്വന്തമാക്കി.
Content Highlights: Faf du Plessis opts out of IPL 2026 auction